6 حاجات متستدعيش خالص انكو تفكرو فى ’’ الطلاق

- 6 حاجات متستدعيش خالص انكو تفكرو فى ’’ الطلاق ’’ :
اخر واحده هتصدمكو انا عارف .

مش عارف ليه بقى التريند دلوقتى انه اى حد يشتكى لاى حد او زوجه تشتكى لصاحبتها من زوجها او حتى ال life coaches بقت بتستسهل جدا موضوع الطلاق .

فى الليسته دى هنكتب بعض الحاجات الى بتحصل ’ وطبيعيه جدا ’ متستدعيش انكو تطلقو , لكن تستدعو انكو تتكلمو فيها مع بعض . او تحلوها . لكن ابدا ابدا متجيبوش سيره الطلاق .

1- فى مشاكل ماديه , فى الحقيقه كل الى اعرفهم متجوزين تقريبا بيواجهو فى مرحله ما تحديات ماديه فى حياتهم ومستواهم الى نفسهم يعيشوه . فطبيعى يكون فى مشاكل ماديه وكون فى مشاكل ماديه مش معناه انه فى طرف ما عنده مشكله او محتاج ينفصل , بل هما محتاجين يشتغلو على اهميه الجانب دا فى حياتهم قبل ما يفكرو فى الانفصال ,
غريبه جدا لما الاقى الناس بتقول للشخص الى قدامه لو للزوجات بالذات اول ما يكون فى مشاكل او تحديات ماديه ( اتطلقى طالما فى مشاكل ماديه ) .

2- البرود الجنسى : بعد الجواز من ( تلات سنين لخمسه ) معظم المتزوجين بيلاحظو فى فتور ما فى العلاقه الجنسيه الى بينهم , والرغبه بتقل ( ودا ليه علاقه بهرمونات زى السيروتونن والاوكسيتوسين ) ودى هرمونات الرغبه والحب , فمش معنى انك كراجل بداء يكون عندك فتور او عدم رغبه جنسى فى شريكه حياتك يبقى تفكر فى الطلاق ! فكرو ازاى تجددو شغف علاقتكو الجنسيه من اول وجديد .

3- الخرس الزوجى : بيسبقه دايما ’’ ملل زوجى ’’ ودى بصنفها دايما فى مشاكل ( ال verbal communication - التواصل اللفظى بين الزوجين ) .. ودا بالتدريج بيقود لجانب تانى من عدم التواصل ( غير اللفظى ) 

زى الغزل او المعاكسه او الكلام الحلو او حتى الحميميه بين الزوجين او الهدايا .  

الخرس الزوجى علاجه سهل وممكن يخلص فى جمله واحده ( اخلقو انشطه مشتركه تربطكو ببعض مهما حصل ) .

4- عينيه زايغه : ( اعتقد دا اكتر سبب مضحك ) للرغبه فى الانفصال سواء طلاق او فشكله , ولما بسمع زوجه بتقولى كدا او بنوته بقولها ( دا ال default بتاعنا ) ربنا خلقنا بال default دا . 

فى رجاله بتعيش بالموضوع دا , وفى رجاله بتقاوم دا وبتزداد رجولتها . على حسب .( لكن صدقينى مش معنى انه عينه زايغه انه خاين ) التعبيرين مختلفين تماما .

5- مشاكل الاصحاب : يمكن دى اكتر حاجه منتشره حاليا , بسبب كام صوره على الانستجرام او بوستات على الفيس بوك , او صوره بالعربيه الجديده او فيلا تحفه فى التجمع او زايد تقوم الزوجه قالبه الدنيا انه جوزها ليه مش بيشاركها نفس الانجازات الى ازواج تانيه بتقدر عليه .
احيانا هتحسى انه فى مشاكل لزوجات اخرين ابسط من مشاكلك وقالبين عليها الدنيا .
واحيانا هتحسى انه فى مشاكل اكبر من مشاكلك بمراحل . 

فى الحالتين افتكرى انه ( مشاكلك هى مشاكلك ) ومتخصش حد تانى ومحدش هيستحملها غيرك . ونصيحه من عويس على جنب ( حاولى متسمعيش مشاكل على اد ما تقدرى )

6- النزوات : فى الحقيقه لاننا فى مجتمع معندوش وعى زوجى صحى او عاطفى حتى صحى , هتلاقو كتير من الزواجات بعد 10 سنين فما فوق ( خصوصا بعد السنه ال 12 ) بلاحظ سلوك ’ نزوات ’ عند الطرفين ( مبقتش حكر بس على الرجاله زى زمان ) بقت كمان الزوجات عندها ’’ نزوات ’’ والنزوه تعريفها : رغبه فى الارتباط بشخص مختلف تماما عن الشريك الحالى ومؤقته . مش بتتحول لعلاقه كامله او زواج تانى . 

فلو حصل انه فى نزوه يبقى انتو محتاجين تتكلمو . ولو حصل انه فى نزوه وعدت يبقى متعاقبش الطرف الاخر على صراحته معاك مهما كان . 

وافتكرو النزوات * بالرغم انها مش شيئ رومانسى وافلاطونى جميل , لكن بتحصل فى علاقات كتير وعلاقات ناجحه كمان , بس التحدى هو ازاى تتغلبو على النزوه المعينه دى .